|
|
|
|
|
|||||||
| هيئة إدارة تحرير مجلة عاشقة الصحراء التي تعنى بقضايا المرأة العربية والأدب والفن | |||||||
|
بخاطري كلّش أجيكْ .................. بقلم الشاعرة وفاء عبدالرازق - العراق
منَينْ اجيبْ اعيون بيها
الشَوَف گدَّكْ؟
شلون امدهم شوگ ذرعاني
اعْلى حدَّكْ؟
وياچَتِف بي حيل تَچوة
ايصير سدَّكْ؟
كلِّش مشتهيه اشوفكْ
ياناي ضلعي المالي حَيَله
المنَّه بيه ايروف جرحه
نفخة تمشي بزوَد گوة
او نفخات الخسارة تگلِّي عوفه
شلون اجيلك
وآنه الخايفة اعليَكْ منِّي
ومِن جفِن رمشْ التمنِّي
مِن أجيس ارْغيف خدَّكْ
انا يَ الهدني غرامكْ
وانت سحر البيكْ هدَّكْ
جيت اجيك
بدَّلِتْ عشرين مرة وما لِگيَتْ
ما لِگيَتْ ارسوم مِنِّي
شايله ثلثين عمري
بين ظنِّي والتمنِّي
وبالمراية چَنِّي آنه موش آنه
والملامح مَ اعْرِفَنِّي
جيت اجيك
او حسبت موعدنا باچر
إي او أدري تواعدينه
او رفَّت اشفاف الخواطر
وادري الحچي ينباگ امْن اشوفك
وابگى بس اعيون موجة
تنعس الخاطر اجروفك
او لمَّا شفت الگلَب كاشخ
بثوب ازرگْ مِن حنينه
عطّريته او عطّراني
او هدَّيَتْ ليلاتي اعْلى خصري
والمشط يتسلَّه بينه
جهزَّيت البال جوري
گلت ارش عطره اعْلى صدرك
عطشانه تِدري امَّيٍّتي وعدكْ او عذرك
او بِسِت إيد الليل بلچن
تنثني عينه ويطول
وكون كل الوكِتْ ليل
منين ما اجيسك حبيبي
تفوح هيل
هيل لكن شالي الوْكيِّح عذول
امْنْ البَسِت اسمك عباتي
جاني سِتر الكون كلَّه وصار ذاتي
او يوم طخ چتفك بچتفي
صحى كل نايم بروحي
صحى او خلّاني بتول
بخاطري كلِّش أجيلك
واركضت للباب موعد
شفته هدمَتَّه سِنينه
بعِتبِته نفسه انتظاري
ذاك اهو المكسور خاطر
يوم حبَّك صرتْ دينه
أخرَس امچتَّف ونينه
وبسلٍّ الليط سالِّينه
جنِينْ وامجعَّد جبينه.
الكاتب:
سكرتيرة التحرير مريم حمدان بتاريخ: الجمعة 19-04-2024 07:48 مساء الزوار: 467
التعليقات: 0
|
